Роџер Федерер беше видно разочаран на прес-конференцијата по четвртфиналниот натпревар со Хуберт Хуркач на Вимблдон. Швајцарецот им даде сериозни причини за загриженост на своите навивачи, велејќи дека е можно ова да е неговиот последен Вимблдон, и дека во наредните денови ќе донесе конечна одлука дали ќе учествува на Олимписките игри во Токио.
„Јас сум многу разочаран. На крајот од мечот се чувствував многу уморно и можев да заспијам дури и во моментот. Дадов се од себе на теренот. Последните 18 месеци беа многу долги и тешки за мене, коментира Федерер.
„Она што треба да го сторам сега е да анализирам што се случи и да го слушнам мислењето на луѓето од моето окружување. Треба да процениме дали моето учество тука е позитивно или не, како и да разговараме што ќе правиме понатаму. Во однос на денешниот натпревар, ветерот играше улога, но во исто време моето движење по теренот можеше да биде и подобро. Во овој поглед, сè уште не сум на нивото што сакам да бидам. Пробав сè и навистина сакав да постигнам нешто повеќе на турнирот, но очигледно тоа не беше можно “, додаде Федерер.
Освојувачот на 20 грен-слем титули е ставен на списокот на швајцарски спортисти за претстојните Олимписки игри, но рече дека се уште не одлучил дали ќе патува во Јапонија.
„Во следните неколку дена ќе размислувам за моето можно учество на Олимписките игри. Пред некое време реков дека ќе почекам до крајот на Вимблдон да ја донесам таа одлука, така што сè уште не знам. Во моментов не можам да кажам ништо повеќе. Прерано е да дадам изјава на оваа тема“, откри осумкратниот шампион на Вимблдон.
На прашањето дали размислува да се повлече од активната игра, тенискиот ас одговори: „Не. Треба само да направам пауза и да размислувам во перспектива. Морам внимателно да ја изберам следната голема цел, бидејќи планината се искачува чекор по чекор. Вие не можете само да скокнете на врвот. Во таа смисла, Вимблдон беше важен чекор напред. Сега треба да анализираме што успева, а што не, но и како се чувствувам физички и психолошки. Знаев дека ќе биде многу тешко за мене. Морам внимателно да размислувам и да планирам што претстои, но сигурно имам намера да продолжам да играм“, заклучи поранешниот број еден во светот.