Поразите се составен дел од спортот. Некои болат повеќе, некои помалку, во зависност од калиброт на противникот и влогот во мечот. И не секогаш е лесно да се канализира бесот и да се контролира негативната енергија. За тоа треба време за „тренинг“ и на таквите ситуации не се имуни ниту најдобрите спортисти, особено во почетоците на кариерата, па ниту Роџер Федерер, човек со 20 гренслем титули. Признава дека не бил секогаш смирен и воздржан, како што изгледа или каков што беше по последниот пораз од Новак Ѓоковиќ во финалето на Вимблдон.
„Кога губев мечеви, врескав, плачев, кршев рекети. Тоа беа лоши фази, особено кога имав 16-17 години. Во такви моменти губев разум и бев свесен дека треба да заминам од терен за да не бидам отстранет што понекогаш и се случуваше“, вели Федерер.
Швајцарецот вели дека секогаш сакал да има контрола над се што било причина да даде предност на тенисот во однос на фудбалот.
„Кога губите во тенисот, виновни сте само вие. Кога победувате, одговорноста е само ваша. Затоа и се одлучив за поединечен спорт пред колективен, односно, тенис пред фудбал, бидејќи имав чувство дека голманот погреши. Секогаш барав такви изговори иако, да бидам искрен, уживав во екипен спорт“, додаде Федерер.
Федерер во моментот е трет на АТП ранг листата и еден е од најдобрите во историјата на тениската игра. Во кариерата освои 102 титули од кои 20 на гренслем турнирите, освои злато на Олимпијадата во Пекинг во 2008 година и сребро во Лондон во 2012 година и втор е на вечната листа по заработувачка со 126,266,005 милиони долари.