По отвореното писмо на уредникот на најтиражниот норвешки весник „Афтенпостен“, Еспен Егил Хансен до првиот човек на Фејсбук, Марк Зукерберг, Фејсбук одлучи да ја повлече одлуката за забрана за објавување на познатата воена фотографија од голото девојче кое бега од бомба во текот на војната во Виетнам.
„Размената на фотографиите ќе биде дозволена поради нејзиното историско значење“, се наведува во соопштението на глобалната мрежа.
На фотографијата на Ник Ат од 1972 година, се гледа 9-годишната Ким Фук како бега од напалм бомбите. Девојчето вреска, а нејзиното голо тело е покриено со изгореници.
Фотографот Ат освои многубројни признанија по објавувањето на фотографијата, меѓу кои и Пулицеровата награда.
Кога норвешкиот новинар Том Егеланд напиша на Фејсбук пост за „седум фотографии кои ја променија историјата на војната“ и меѓу одбраните фотографии ја приложи и „напалм-девојчето“, фотографијата беше избришана, а на Егеланд привремено му беше забранет пристап на таа социјална мрежа.