На Универзитетската Клиника за гинекологија и акушерство – Скопје денеска беше родено женско бебе-близнак заедно со амнионска обвивка.
Родилката беше со близначка бременост, а бебињата се родени во 34-та гестациска недела. Станува збор за двојајчана близначка бременост, што значи дека двете бебиња имаа засебни амнионски обвивки и засебни постелки, а породувањето беше извршено со царски рез, информираат од Клиниката.
Породувањето го изврши примариус д-р Адела Стефанија, гинеколог, а бебињата се преземени од д-р Рената Димитриеска, педијатар. Тие се наоѓаат на Одделот за интензивна нега и се во добра состојба.
Машкото бебе има 2.210 грама родилна тежина, а се роди со апгар 8/9, додека женското бебе, кое беше извадено со амнионската обвивка, е тешко 2.150 грама и е со апгар 7/8.