Фернандо Алонсо се повлекува од Формула 1 по завршување на тековната сезона. Двократниот шампион во летечкиот циркус објави дека 2018 година е последна во неговата кариера.
„Време е за промена по 17 прекрасни години минати во овој спорт. Пред неколку месеци ја донесов одлуката што е конечна. Ми преостануваат уште неколку трки во оваа сезона и во нив ќе влезат посветено и со страст како никогаш досега“, изјави Алонсо.
Алонсо во моментот е пилот на Мекларен. Во Формула 1 дебитира во 2001 година во трката за ГН на Австралија како член на екипата на Минарди. Првата шампионска титула ја освои во 2005 година во болидот на Рено и успеа да ја одбрани во 2006 година.
Шпанецот беше дел од победничкиот пиедестал по 97 трки, а 32. пати се искачуваше како победник. Последниот подиум го имаше во 2014 година како второпласиран зад воланот на Ферари во трката за ГН на Унгарија. Во 2015 година направи трансфер во екипата на Мекларен со која никогаш не забележа подобар пласман од петто место.
Во осум од 12. трки во оваа сезона освојуваше бодови, двапати беше принуден да се откаже додека петтото место во Мелбурн е негов најдобар настап во 2018 година. Моментно е деветти во генералниот пласман со 44 бода, салдо што очекува да го поправи со оглед дека до крајот на првенството имаше уште девет трки.