Агенцијата „Фич“ го потврди кредитниот рејтинг на земјава на ББ+ со стабилен изглед. Како што се наведува во извештајот, ова се должи на низата кохерентни макроекономски и финансиски политики и подобрите индикатори за управување, развој на човечки ресурси и околина за водење бизнис.
„Фич“ пишува дека домашната политичка ситуација е нормализирана по подолг период на „политичка парализа“ од 2014 година до 2017 година, а процесот на евроинтеграција останува приоритет на земјата и двигател на реформите.
Проекцијата за раст на македонската економија за годинава, забележува „Фич“, е 3,4 проценти од БДП, што претставува забрзување во однос на лани. Растот се очекувања да биде придвижен од домашната побарувачка. Инвестициите во првото полугодие од оваа година пораснале за 10,4 проценти што, според агенцијата, се должи на зајакнатата доверба на инвеститорите и на растот на кредитирањето.
„Фич“ оценува дека трендовите на пазарот на труд се позитивни со раст на вработеноста за 2,2 проценти и намалување на стапката на невработеност за 0,7 процентни поени, односно на 17,1 проценти заклучно септември. Се очекува растот на инвестициите и на вработеноста да бидат поттикнувачи на економскиот раст и во 2020 година, како и растот на минималната плата, пензиите и платите во јавниот сектор.
„Државниот долг е проектиран за умерено да се зголеми од 40,7 проценти од БДП на крајот на 2019 година на 41,2 проценти на крајот на 2021“, пишува „Фич“ и дека владините гаранции за јавни проекти, главно поврзани за проекти за патишта се очекува да се зголемат од 8,1 проценти од БДП во третиот квартал од 2019 на 10 проценти во 2020 година.
Банкарскиот сектор е оценет како стабилен и добро-капитализиран. Депозитите растат за 10 проценти, додека уделот на денарски депозити во вкупните е зголемен и изнесува 61,3 проценти во вкупните депозити, а кредитната активност е повисока за 7,4 проценти, пишува „Фич“.
Кредитниот рејтинг на земата беше зголемен во јуни оваа година од ББ на ББ+, што беше прво подобрување на нашата земја по 13 години.