Пратеникот Антонио Милошоски, кој е и претседател на собраниската Комисија за надворешна политика на денешната седница на Собранието посветена на пратенички прашања побара од премиерот Димитар Ковачевски пред пратениците да се дискутира за преговорите со Бугарија. Милошоски предложи Ковачевски да дојде заедно со министерот Бујар Османи, вицепремиерот Бојан Маричиќ, но и со поранешниот премиер Зоран Заев и поранешниот министер и вицепремиер Никола Димитров, како политичари кои воделе преговори и кои се запознати со деталите.
На тоа Ковачевски одговори дека нема да има ништо против во Собранието да се одржи таква расправа, но му дофрли на Милошоски:
„Ако барате таква седница треба и претходни премиери да се повикаат, а не вака селективно да предлагате. Еден од тие премиери е во странство, ама од него може да се очекува писмено да се обрати. Не е фер да се изолира поканата само на неколку луѓе, туку треба да ги повикате сите поранешни претседатели, сите поранешни премиери, иако еден нема да може да дојде оти е во странство, ама верувам дека дописно ќе се обрати, потоа сите поранешни министри за надворешни работи, затоа што не заслужуваат само министрите од последните два мандата да имаат предност во однос на министрите кои биле во првите два мандати. Да не заборавиме Северна Македонија не постои од денеска“, рече Ковачевски.
Милошоски во својот настап настојуваше дека е добро да се направи споредба меѓу предлозите на португалското и француското претседателство со ЕУ за кревање на бугарското вето.
„Мојата намера е да направиме седница за сите актери кои учествуваа во потпишувањето и создавање на Договорот за добрососедство со Бугарија, затоа што од тој момент имаме надолен тренд во недовербата со соседна Бугарија и блокади. Оние кои што актуелно разговараат, одбиваат или прифаќаат делови од францускиот предлог, да присуствуваат на таа седница“, рече Милошоски. (С.М.)