Филаделфија Иглс стигнаa до првиот трофеј во американската НФЛ рагби лига откако ја добија пресметката со фаворитот Њу Ингланд Патриотс на ЈуЕс Банк Стадионот во Минеаполис.

Со резултат 41-33 во извонреден натпревар со офанзивна игра на двата тима и драма до самиот финиш, Филаделфија успеа да ги надигра „Патриотите“.

Ова е прв Супер Бол за Иглс.

Во најголем дел од мечот, „Орлите“ водеа, но „Патриотите“ направија пресврт и поведоа со 32-33 на десет минути до крајот.

На овој натпревар беа срушени неколку рекорди. Се работи за Супер Бол во кој во досегашната историја на лигата, беа освоени најмногу јарди на двата тима.

„Патриотите“ станаа првиот тим во историјата на НФЛ кој имал повеќе од 600 јарди и загубил, а Брејди стана првиот квотербек кој загубил натпревар откако имал додавања за повеќе од 500 јарди, три додавања за тачдаун и ниту една пресечена топка.

Квотербекот на Филаделфија пак, Ник Фолс беше прогласен за МВП на натпреварот и стана првиот играч кој забележал додавање и факање за тачдаун.

Нереди на улиците во Филаделфија

По завршувањето на натпреварот, 1.500 километри подалеку, во славјето на Филаделфија започнаа до сега невидени изливи на емоции.

Аџена Амир, портпаролката на градоначалникот, изјави дека во градот имало неколку чинови на вандализам во рани утрински часови.

„Искршени се прозорци на неколку згради. Полицијата прими повик за грабеж на барем една бензинска пумпа. Фановите урнаа и неколку светлосни столба, при што се повредени неколку лица“, изјави портпаролката непосредно по завршувањето на натпреварот.

Одличен настап на Џастин Тимберлејк на полувреме

Периодот кога се игра Супер Бол, компаниите во Америка, буквално „се тепаат“ кој да се рекламира додека се игра натпреварот, бидејќи според проценките, милиони долари се трошат за маркетинг.

Воедно, исто толку важно за Американците е и настапот на полувреме на некоја од ѕвездите во шоу бизнисот.

За Џастин Тимберлејк, синоќешниот Супер Бол беше трети во неговата музичка кариера, каде што ги изведе некои од најпознатите хитови во придружба на ансамблот „Тенеси кидс“.