Македонската филхармонија денес со соопштение реагираше на критиките во дел од порталите во врска со одржувањето на конвенцијата на Унијата на жени на ВМРО-ДПМНЕ во големата сала на објектот.
Од Филхармонија посочуваат дека салите во зградата редовно ги изнајмуваат и не е прв пат политичка партија или здружение да ги користат со плаќање на финансиски надомест.
„Таков беше политичкиот собир на ДУИ во 2019 година, промоцијата
на публикацијата „Моето патување во Фантазија“ во 2022 година, на кој се обрати и
тогашниот премиер Зоран Заев, НАТО конференцијата за комуникатори во 2022
организирана од Министерство за одбрана, настанот за одбележување на првата
година од членството во НАТО, три настани во 2022 во организација на кабинетот на претседателот Стево Пендаровски, свечен прием на МНР по повод 30 години
дипломатски односи со Хрватска, собир на Демократската партија на Турците, настан на Управата за јавни приходи итн.“, велат од Филхармонија.
Притоа Филхармонија тврди дека критиките во врска со комерцијалното
издавање на објектот претставуваат само обид за дефокус од одлуката „без преседан“ на Министерството на култура принудно да го „вдоми“ новоформираниот Национален џез-оркестар во зградата на Филхармонија, односно „наметнувањето на паралелно функционирање на две национални установи под еден покрив“, како што се наведува во соопштението до јавноста.
„Случувањата во Македонска филхармонија немаат никаква врска со политиката, туку со некоректниот однос од Министерството за култура. И порано и сега, а и во иднина салите на Филхармонија се изнајмуваат за организирање општествено, културно или музички настапи во организација“, велат од оваа музичка институција.
Раководните луѓе на Филхармонија нагласуваат дека објектот мора да се изнајмува, бидејќи се неопходни дополнителни средства за нормално да функционира националната институција.
„Министерството на култура постојано ни го крати буџетот, поради што нема доволно пари за спроведување на програмските активности на Филхармонија и за одржување на зградата. Токму од овие причини сме приморани да ги изнајмуваме салите. Минатата година кога ни скратија голем дел од буџетот, од нашата сметка моравме да платиме гостувања на солисти, диригенти, хорови. Ги плаќаме сите надворешни соработници, голем дел од нив се музичари во оркестарот чии места недостигаат, а нови вработувања нема. Од сопствена сметка плаќаме и кирија за инструментите, понекогаш и набавка на некој инструмент, поправка на инструменти, што е висока ставка“, порачаа од Филхармонија.
Притоа уште еднаш нагласија дека филхармонискиот и џез оркестарот „не можат да функционираат под еден покрив“, и дека „никаде во светот не се сместени заедно филхармониски и џез-оркестар“.