Нови два сомнителни случаја на заболени од коронавирус во земјава. Станува збор за државјани на Австралија и на Сингапур кои во земјава допатувале на 28 февруари со летот на „Визер“ од Келн. Отседнале во хотел во центарот на главниот град чиј персонал алармирал за нивните симптоми до надлежните институции. Ова го истакна министерот за здравство, Венко Филипче на пладневната прес конференција во Владата.
„Медицински екипи веднаш ги посетиле лицата, земени се брисеви и резултатите се чекаат во текот на денот. Во меѓувреме, Австралиецот и Сингапурецот ќе останат во изолација во хотелските соби“, нагласи Филипче.
Министерот за здравство информира и за препораките на Владата за заштита од коронавирус. Мерките да не се одржуваат масовни собири се пролонгирани за уште една недела, поточно до 13 март, а во нив и предлогот за спортските натпревари да се играат без присуство на публика, особено на оние за кои се очекуваат и гости од странство.
„Ова е последица на ширењето на коронавирусот во Европа. Бројката на заболени утрово се искачи на 4.250 што е, речиси, за 1.000 повеќе во однос на вчерашниот ден. Во регионот е забележан еден нов случај на заболен од коронавирусот во Словенија и двајца во Република Српска“, дополни Филипче.