„Обиди за партиски влијание имало и секогаш ќе има, меѓутоа ние се трудиме тие влијанија да ги сведеме на минимум, со вработување на млади доктори коишто имаат висок просек од студирање. Со тоа што се докажале, со тоа што публикувале трудови ние докажуваме и покажуваме дека ќе се стимулира квалитетот и веќе имаме примери. По некои клиники примени се врвните студенти и така ќе продолжиме и во иднина“ вели министерот за здравство Венко Филипче во неделното интервју за „Радио Слободна Европа“.

Филипче додава дека нема да отстапи од тоа задолжителната вакцинација да  биде услов за запишување на децата во училиште и оценува дека се многу сериозни антивакциналните кампањи. Сите тие вести дека  вакцините се поврзуваат со разни болести , дека постојат искуства дека одредени болести се поврзани со вакцините се лажни вести вели Филипче.

Објавата на фејсбук како ја вакцинира внука му, Филипче вели дека била во насока на кампања дека вакцините се безбедни, и потврдува дека не била вакцинирана од МРП затоа што е мала.

„Секогаш е добро да се покаже со личен пример дека нешто е вистина, дека нешто е вистински чекор и дека нешто е вистинска политика. И во таа насока беше вакцинирањето на мојата мала внука, која е се уште мала и не може да биде вакцинирана од МРП, меѓутоа и објавата беше во насока на тоа дека ние како здравствени власти ги уверуваме сите граѓани, родителите на малите деца дека вакцините се безбедни. Процесот на вакцинација е апсолутно безбеден, дека тоа е вистинска инвестиција во здравјето на децата. Мојот чин беше во однос на сите овие аргументи“ рече Филипче за Радио Слободна Европа.

Интервјуто на Филипче предизвика реакции од опозицијата. ВМРО ДПМНЕ ја обвини СДСМ дека кога биле во опозиција создавале недоверба кон вакцините и сега незнаат како да го решат хаосот .

„Признанието на Филипче, дека не ја вакцинирал внуката од морбили која е премногу мала, но ја однел пред камери дека се вакцинира со цел медиумски да ги излаже граѓаните е уште еден доказ дека СДСМ си поигрува со здравјето на граѓаните“ пишува во соопштението од ВМРО ДПМНЕ.