Претседателот на СДСМ, Венко Филипче, на прес-конференција порача дека „лажниот патриотизам“ на власта предводена од Христијан Мицкоски е целосно разобличен и дека зад реториката се кријат спротивни постапки на предавници на националите и државни интереси.
Вчера премиерот Христијан Мицкоски ретерираше од најавениот закон од неговите пратеници за тоа пратениците да немаат двојни државјанства. И уште една нивна лага е разобличена. Зошто? Поради тоа што министри и пратеници на ВМРО-ДПМНЕ, градоначалници, функционери, директори на јавни претпријатија имаат бугарски пасоши. Толку од нивниот патриотизам, истакна Филипче.
Тој нагласи дека СДСМ со конкретни предлози ја разоткрил, вистинската намера на власта.
Вистината е дека ги пресретнавме и разобличивме уште една нивна лага, уште еден нивен лажен патриотизам. Кога дадовме амандмани и најавивме дека тој предлог-закон ќе важи и за актуелниот пратенички состав, а не како што тие сакаа за од следните состави, и кога го поднесовме и нашиот предлог-закон членовите на Владата да немаат двојни државјанства – тие постепено ретерираат. Лажниот патриотизам повеќе не функционира. Станува збор за предавници на националните интереси, на интересите на земјата и на интересите на граѓаните. Граѓаните и државата тоа не го заслужуваат, порача Филипче.
Во своето обраќање, Филипче беше дециден дека политиките на власта не се во интерес на граѓаните.
„Лажниот патриотизам сè повеќе се разобличува и секој ден сè повеќе излегува на виделина. Толку од лажните патриоти. Толку од лажниот патриот Мицкоски, којшто ќе го враќаше името, ќе го поништуваше Преспанскиот договор, ќе го поништуваше договорот за добрососедство со Бугарија, потенцираше тој.
Филипче оцени дека суштината на владеењето е спротивна на декларативните заложби.
Што е суштината на нивното владеење? Тие се една организирана криминална група, заедно со нивниот привезок ЗНАМ. ВМРО-ДПМНЕ ги предадоа националните интереси и довербата на гласачите, а ЗНАМ освен што ја изневери довербата на гласачите, ја оштети и својата матична партија. Од такви предавници не може да се очекува да водат држава како што треба, а најмалку што може да се очекува да се патриоти“, нагласи Филипче.