Нема ништо страшно, обичен брис се зема од децата. Целта е да се открие дали ќе има асимтоматски носители на вирусот меѓу децата – појасни министерот.
Mоделот за скрининг на учениците од основните и средните училишта е подготвен и, заедно со Министерството за образование, утре ќе почнат да бараат дозволи од родителите, најави денеска министерот за здравство, Венко Филипче, по настанот за подигање на свесноста за значењето на донирање органи и ткива, како и коскена срцевина во лекувањето и спасувањето човечки животи.
– Закаснивме една недела. Скринингот требаше да започне оваа недела. Меѓутоа, нешто подолго потрае анализата на бројот на учениците во училиштата, основни и средни. Со оглед на тоа што сега е готова методологијата, од утре ќе почнеме да бараме писмена согласност од родителите, заедно со МОН. Верувам дека до крајот на оваа и почетокот на следната недела тоа ќе се обезбеди, за од следната недела да се спроведе скринингот, рече Филипче одговарајќи на новинарско прашање.
Тој апелираше родителите да го прифатат скринингот и додаде:
– Нема ништо страшно, обичен брис се зема од децата. Целта е да се открие дали ќе има асимтоматски носители на вирусот меѓу децата и дали тој се пренесува во самите училишта, појасни министерот.
Со скринингот ќе бидат опфатени околу 8 200 деца, кои ќе се тестираат по случаен избор.
Следниот понеделник, најави Филипче, во Владата ќе се разговара за воведување на мерката во затворените места да може да се влезе само со сертификат за примени две дози вакцини.
– Веројатно ќе оставиме уште една или две недели дополнителни, со оглед на тоа што веќе е најавено, за да почне да важи препораката да во сите затворени места, согласно сегашните мерки на Комисијата, наместо со една доза, биде потребен сертификат со две дози на примени вакцини, посочи министерот.