Според министерот за здравство Венко Филипче, зголемувањето на бројката на заразени е очекувана, но добро е, вели тој, што бројот на случаи се зголемува линеарно што значи дека здравствениот систем има капацитет да ги прими сите пациенти.
„Добро е што бројот на случаи се зголемува линеарно, а не експоненцијално, што значи дека секој ден имаме приближно еднакво зголемување, што сè уште му дава шанса на нашиот систем за одржливост и можност соодветно да ги прими и амортизира сите пациенти без притоа да бидат пренатрупани нашите капацитети“, оценува Филипче притоа нагласувајќи дека, сепак, сè уште сме во една форма на војна против коронавирусот.
Тој вели дека е рано за заклучоци, но линеарниот раст на заболени во последните 15 дена, според него, охрабрува. Приближно ист број на заболени на дневна основа е, како што истакна, цел од самиот почеток, бидејќи со ваков тренд здравствениот систем ќе може да ги опслужи граѓаните и добро да се справи со болеста. Сепак, нагласи дека пикот на епидемијата допрва доаѓа и потребна е дисциплина од сите и следење на мерките и препораките.