Патниците со авионите на „Визер“ од Милано и од Венеција на скопскиот и на охридскиот аеродром ќе треба да пополнат здравствен лопкатор – карта што е уште еден чекор во превенирање и регистрирање на евентуално заболени од коронавирусот кои доаѓаат во државата.
„Согласно тоа што има сè повеќе заболени во Европа и согласно поригорозните мерки што италијанските власти ги најавија за северниот регион, се одлучивме за уште еден чекор за подигање на контролата на повисоко ниво што значи на патниците со авионите од „Визер“ од Милано и од Венеција на скопскиот и на охридскиот аеродром ќе треба да пополнат здравствен локатор, карта на што се согласи авиопревозникот со која ќе се овозможи добра контрола и следливост на патниците“, рече министерот за здравство Венко Филипче на денешната прес-конференција.
Патниците, како што појасни министерот, ќе остават податоци на која адреса престојуваат и доколку по одреден број денови се јави некој патник со симптоми ќе биде лесно да се најдат сопатниците кои седеле неколку редови пред и зад тој патник во авионот. Министерот Филипче посочи дека препораката за неодржување масовни јавни собири важи до 6 март.
Тој информира дека во изминатото деноноќие нема нови пациенти кои се тестирани за коронавирусот. Потсети дека вчера на Клиниката за инфективни болести се јавиле тројца пациенти, двајца патници од Италија и еден од Шпанија, кој престојувал во тамошни болнички установи за друга здравствена причина.
„Кај сите тројца пациенти имаше индикација за тестирање согласно симптомите и тестовите беа негативни. Единствената пациентка која што е хоспитализирана на Клиниката за инфективни болести е добра и нејзината здравствена состојба се повеќе се подобрува“, рече Филипче.