Пациентката со дијагностициран коронавирус на Клиниката за инфективни болести се чувствува добро и веќе трет-четврти ден е без температура. Полека влегува во постабилна фаза од болеста. Во меѓувреме нема нови пациенти кои се тестираат за коронавирусот, изјави денеска министерот за здравство Венко Филипче, кој заедно со премиерот Оливер Спасовски го посетија граничниот премин „Табановце“ со цел проверка на системот за превенција од коронавирус.
Филипче посочи дека во текот на вчерашниот ден стигнале и контролните резултати од лабораторијата во Германија, со која Министерството соработува, и ги потврдиле досегашните тестови, сите негативни и позитивниот на пациентката, што е обврска и функционира како супервизија на работата на лабараторија во рамки на Институтот за јавно здравје.
„Набавката на дополнителна заштитна опрема е во тек. Во текот на вчерашниот ден го потпишавме договорот за дезинфекциските средства и тие веќе од утре ќе бидат дистрибуирани со помош на локалната самоуправа во основните училишта, каде за тоа има потреба“, додаде Филипче.