Медицинскиот персонал го сочинувале двајца лекари и четири медицински сестри. Меѓу медицинските работници нема починати и повредени.
Починатите во пожарот во Тетово кој избувна синоќа биле на возраст од 29 до 79 години. Освен класичните обдукциони наоди, на Институтот за судска медицина ќе се прави и анализа на ДНК за за утврдување на идентитетот на починатите, за што се информирани и членовите на семејствата на пациентите, изјави министерот за здравство, Венко Филипче, на денешната прес конференција во Владата, по синоќешната трагедија во Тетово кога во пожар изгоре модуларната болница и настрадаа 14 пациенти.
Министерот Филипче рече дека во ковид центарот имало 26 пациенти кога се случил пожарот, а медицинскиот персонал го сочинувале двајца лекари и четири медицински сестри. Меѓу медицинските работници нема починати и повредени. Тој информираше дека 12мината пациенти кои синоќа беа евакуирани се во добра здравствена состојба и се лекуваат во тетовската болница.
На Институтот за судска медицина се телата на 14 пациенти, за дел е завршена одбукцијата, а за дел ќе се одвива во текот на денот.
– Сите капацитети се целосно мобилизирани, а во моментот се уште трае истрагата за пожарот. На владина седница е донесена одлука и експерти од странство да се придружат за независна и темелна истрага и сите наоди јавно ќе бидат презентирани – додаде Филипче.
Во врска со тоа има ли и починати меѓу придружниците на пациентите, според информациите имало двајца кои ги придружувале хоспитализираните во болницата, Филипче рече дека за тоа се уште нема информација, дека треба прво да се почека да заврши обдукција на починатите на Институтот за судска медицина.