Донор на срцето е млада пациентка кај која во вторникот на КАРИЛ ѝ била дијагностицирана мозочна смрт, а нејзиното семејство одлучило да ги донираат нејзините органи.
Пациентот кому завчера му беше пресадено срце се чувствува добро и закрепнува по успешно изведената трансплантација.
– Сашо се чувствува добро по извршената трансплантација на срце. Тој е контактибилен и се опоравува. Од голема важност е постоперативниот период. Му посакувам многу здравје и што побрзо да се врати на вообичаените животни навики, објави министерот за здравство Венко Филипче утрово на Фејсбук.
Донор на срцето е млада пациентка кај која во вторникот на КАРИЛ ѝ била дијагностицирана мозочна смрт, а нејзиното семејство одлучило да ги донираат нејзините органи. Ова е шеста трансплантација на срце во земјава од мај минатата година.
– Голема благодарност до семејството за нивниот хуман гест. Да се мисли да се спаси туѓ живот во моменти кога се губи животот на најблискиот е храброст и човечност кои немаат цена, напиша Филипче, кој пред два дена објави дека млада пациентка се подготвува да прими бубрег од донорот, а дека ќе бидат експлантирани и коскени ткива.