Во Македонија се внесуваат безбедни и проверени вакцини, изјави министерот за здравство, Венко Филипче. „Нема место за паника. Вакцините се европски и сигурни“, тврди министерот за здравство Венко Филипче, коментирајќи ја објавата на неговата Фејсбук страница, како дел од кампањата за придобивките од членството во ЕУ, каде што се наведува дека „членството во ЕУ значи подобри здравствени услуги за сите, а за нашите деца значи најквалитетни вакцини“.

-Пред нова вакцина да биде одобрена на пазарот, поминува низ строга регулаторна постапка за проценка на квалитетот, ефикасноста и безбедноста, се вели во објавата.

На прашањето, дали тоа значи дека досега вакцините не биле безбедни, Филипче рече дека се работи „за можеби несреќно избрани зборови“.

Министерот рече дека во календарот за имунизација за 2019 година воведени се уште две вакцини со европски и светски квалитет. „Моментално во потполност се гарантира за квалитетот на вакцините, затоа што истите се од реномирани производители од земји на Европската Унија (Франција, Белгија, Бугарија) одобрени производители од страна на СЗО кои ги исполнуваат сите потребни стандарди“, рече Филипче.

Според него, загрижувачки е податокот дека во земјата паѓа опфатот со вакцинација за одредена болест.