Министерот за здравство, Венко Филипче најави дека во следните седум дена можеме да очекуваме да стигна нарачаната количина од 500 илјади дози на „Синовак“.
„Утрово стигна таа информација за ‘Синовак’. Добра вест е дека тоа што е одделено како количина за нашата земја е во спакувани кутии со шприцеви, што го олеснува процесот за имунизација. Оставам резерва тоа да се промени, гледате со што се соочуваме, но верувам дека оваа најава ќе се оствари “, кажа Филипче на промоцијата на реконструиран оддел на Клиниката за торакална и васкуларна хирургија, во вредност од 60 милиони денари.
На вакциналните пунктови во државата заклучно со вчера вакцинирани се вкупно 241.368 граѓани, а на веб страната vakcinacija.mk пријавени се 437.339 граѓани.
Филипче кажа дека изминатото деноноќие немало ниту еден прием на пациент на скопските Ковид-центри. Согласно овој тренд на намалување на бројката на новозаболени и хоспитализирани лица, тој рече дека на следниот состанок на Комисијата за заразни болести после 15 јуни, ќе се разговара за олеснување на рестрикциите, меѓу кои и за полицискиот час и за организирање на концерти.