Дваесет илјади АстраЗенека вакцини кои Р. Грција, во координација со Европската Комисија, ги донираше на РС Македонија месецов, се веќе дистрибуирани до вакциналните пунктови ширум земјата. Оваа донација е уште една потврда на успешната соработка меѓу министерствата за здравство на двете земји во справување со Ковид-кризата.
„Ова е потег на вистинско пријателство и соработка од страна на Атина. Благодарни сме за она што Грција го направи со вакцините, особено во време кога треба да ја зголемиме стапката на стабилност, со поголем број вакцини и вакцинирани граѓани“, изјави министерот за здравство, Венко Филипче за грчки Етнос,
Тој додаде дека комуникацијата со грчкиот министер за здравство, Василис Кикилиа, била континуирана и успешна во текот на целата пандемија.
„Споделуваме информации, искуства и стратегии, што се надевам дека ќе продолжи и во иднина. Со Република Грција имаме ист пристап во управување со пандемијата, а оваа помош е навистина значајна за нас“, додаде тој.
Инаку, во Република Северна Македонија со АстраЗенека се вакцинираат граѓани над 60-годишна возраст, а вакцинацијата се одвива непречено на сите пунктови низ државата. Досега, вкупниот број на аплицирани дози изнесува 542.699, ревакцинирани се 220.884 граѓани, а бројот на лица кои се пријавила за вакцинација преку веб платформата vakcinacija.mk е 469.212 граѓани.