Дополнителната заменик министерка за финансии, Гордана Димитриевска-Кочоска речиси цел месец го кочи проектот од Светска банка вреден 90 милиони евра за справување со ковид-19. Средствата, меѓу другото, се наменети за кревети за интензивна нега за сите инфективни одделенија во државата, за лабораториски капацитети, изјави министерот за здравство, Венко Филипче. Тој притоа информира дека Димитриевска-Кочоска неколку пати испраќала барање до Министерството за здравство (МЗ) за објаснување за што ќе се употребуваат средствата и исто толку пати и било одговорено.
Според првиот човек на МЗ, прашањата на заменик министерката за финансии се повторуваат, а со таа нејзина постапка на одолговлекување, не се одобруваат средствата за здравствениот систем, односно за ургентна поддршка за зајакнување на капацитетите за третман на ковид пациенти.
„Средствата што се одобрени, а не ги одобрува Димитриеска Кочоска, ќе помогнат да ги опремиме сите инфективни оделенија во државата, пред сè со интензивни кревети, машини за сликање, лабораториски капацитети и друго. Има еден дел од средствата за едукација на лекарите, потоа за надградување на епидемиолошките центри со комплемнта опрема, односно овие средства се за сите аспекти кои ги покрива коронавирусот“, појасни Филипче.
Министерот информира дека за овој одобрен кредит, тој претходно имал конференс-кол со генералниот директор на Светската банка, од каде први излегле во пресрет и во рекорден период го одобриле кредитот. Брзото одобрување, според Филипче, се должи на потребата за зајакнување на капацитетите во борбата со коронавирусот.