Од главниот аеродром во Сао Паоло се украдени 720 килограми злато чија вредност се проценува на повеќе од 30 милиони долари. Бразилските власти соопштија дека не успеале да го пронајдат пленот, а нема трага ниту од криминалната банда од најмалку 20 лица.
Според полицијата, групата најпрво го киднапирала директорот на карго сервисот на аеродромот со семејството и ги држеле како заложници за да го натераат на соработка. Потоа, дел од групата киднапери пристигнале на аеродромот со пикап возила исфарбани да личат дека се полициски, а неколку минути подоцна побегнале со златото, пренесуваат американските медиуми.
Полицијата вчера соопшти дека проверува дали станува збор за истата група која минатата година од друг аеродром во Сао Паоло украде пет милиони долари. Операторот на аеродромот, компанијата „ГРУ Ерпорт“, соопшти дека златото требало да биде транспортирано во Торонто и во Њујорк.