Финансиската полиција постапувала по наредба на надлежен јавен обвинител од обвинителството за гонење на организиран криминал и корупција кога вчера влегоа во кабинетот на градоначалникот на Гостивар, Невзат Бејта. Тие негираат дека таму биле како инструмент за вршење политички притисок.
„По наредба на надлежен обвинител, како дел од правосудната полиција, финансиската полиција влезе поради постоење на сомнение за злоупотреба на службената положба при спроведување јавни набавки. Најостро ги осудуваме сите обиди за политизирање на овој случај во дневно политички цели“, се вели во соопштението на Финансиската полиција.
Финансиската полиција вчера влезе во канцеларијата на гостиварскиот градоначалник Невзат Бејта, јави телевизијата „ТВ21“. Бејта, кој е потпретседател на ДУИ, тврди дека оваа посета од финансиката полиција претставува реваншизам поради неговото отворено противење партијата повторно да коалицира со ВМРО-ДПМНЕ.
Ова прв пат се случува откако кажав дека нема Албанец што сака коалција со Груевски. Јас како потпретседател на ДУИ давам изјави кои мислам дека се важни за општеството и не прифаќам политички уцени, рече Бејта за „ТВ 21“.
Од финансиската полиција за телевизијата изјавиле дека предмет на проверките е инфраструктурен проект на општината во селото Тумчовиште кој чинел 80 илјади евра или истиот проект кој претставуше пат којшто ги поврза селата Тумчовиште и Чегране, а на коешто отворање Бејта и Груевски заедно сечеа лента.