Фирма од Бахамските Острови индиректно се појавува како еден од доверителите на компанијата „Графички центар“ која од денеска е во стечај. Станува збор за „Мерит Интернешнл ДОО“ од Бахамските Острови, а директор е бугарскиот државјанин, Цанко Комаров.
По денешната објава на интернет сајтот на Централниот регистар за почнување на стечајна постапка на „Графички центар“, НОВА ТВ ги провери фирмите кои се јавуваат како доверители.
Станува збор за фирмите Друштво за производство, трговија и транспорт Доника и Мујадин ДООЕЛ експорт – импорт од Тетово и “ПОЛИГРАФСНАБ” АД од Софија, Бугарија.
Од фирмата од Тетово, за НОВА ТВ изјавија дека „Графички центар“ од нив купувала хартија за печатење на весниците и дека им должи околу 70.000 евра.
Втората фирма ја проверивме во бугарскиот централен регистар и како сопственици на “ПОЛИГРАФСНАБ” АД од Софија се јавуваат Цанко Комаров, Ивајло Данов и компанијата од Бахамските Острови „Мерит Интернешнл ДОО“. Цанко Комаров фигурира како директор и во бахамската фирма.
Колку должи „Графички центар“ на оваа фирма засега е непознато, освен што е познато дека во последниот период раководството на „Медиа Принт Македонија“ хартија набавуваше од Бугарија. На сајтот на фирмата “ПОЛИГРАФСНАБ” пишува дека се занимава со производство на повеќе видови на хартија, меѓу кои и за весници.
Компанијата „Графички центар“ е сопственик на Медиа Принт Македонија (МПМ), издавач на весниците „Дневник“, „Утрински весник“, „Вест“, „Македонски спорт“, „Теа модерна“ и порталот „Телеграф“.
До пред неколку месеци во сопствеништвото на „Графички центар“ беа и „Орка Холдинг“ на бизнисменот, Јордан Камчев и компанијата „Интернет Инвестмент груп“ чиј сопственик е Јана Станисављева. По нивното повлекување, во сопственичката структура остана единствено Срѓан Керим преку неговата фирма „Мирекс“.
Во меѓувреме, отворена беше нова фирма „Медиа Принт ДООЕЛ“, каде се префрлени дел од новинарите, а поголем дел од вработените фирмата ги прогласи за технолошки вишок.