Од денеска до 15 октомври , трае повикот што го објави Фондот за иновации и технолошки развој (ФИТР) во износ од 8 милиони евра и за кој можат да аплицираат претпријатија кои досега не користеле никогаш грант.Повикот е за кофинансирани грантови за комерцијализација на иновации, а можат да го користат претпријатијата кои сакаат да развијат иновативен производ, услуга или процес, сами или во соработка со друга фирма и/или со установа која врши научно-истражувачка дејност.
Аплицирањето е исклучиво онлајн, а максималната поддршка за проектите ќе биде 20 милиони денари.
Како што истакнаа вицепремиерот за економски прашања, Фатмир Битиќи и директорот на Фондот, Коста Петров на заедничката прес конференција, станува збор за најголем јавен повик на ФИТР годинава според обемот на обезбеден буџет за кофинансирање. Има и една новина, и тоа кај механизмот за повраток на средства – доколку корисникот достави доказ за инвеститор кој вложил износ од најмалку 50 отсто од износот на финансиска поддршка доделена од Фондот, корисникот ќе биде ослободен од обврската за плаќање на ројалти.
Ова е деветти повик на ФИТР со што уште еднаш се потрвдува дека оваа институција е вистински дом за поддршка на креативни и иновативни проекти на млади луѓе и фирми, стартапи, мали и микро компании кои имаат план за раст и развој, потенцираат Битиќи и Петров.