Премиерот на Словачка, Роберт Фицо во соработка со Европската комисија ќе предложи компромисен предлог за реформи во европската политика што се однесува на политичкиот азил за мигрантите, односно за планираните квоти на распоредување на бегалците во земјите од ЕУ.
– Квотите се политички мртви. Никој не ги почитува и никој не ги применува ниту пак знае како да го направи тоа, иако истите правно се живи бидејќи се чека на одлука од министрите за внатрешни работи, вели Фицо за словачките медиуми.
Според него секоја членка на ЕУ сака да покаже солидарност и одговорност но на различен начин.
Тој дополнува дека за неговата земја е важно квотите да бидат и правно мртви и да се прифатат различните гледишта за солидарност со бегалската криза.
Словачка, која претседава со ЕУ во моментов, сака својот алтернативен предлог да го стави на маса на наредниот самит на ЕУ во Брисел во декември.