Досегашниот вицепремиер за инвестиции и дигитализација Петар Пелегрини ќе биде новиот премиер на Словачка, откако денеска шефот на државата Андреј Киска соопшти дека ја прифатил оставката на Роберт Фицо, која уследи по по антивладините протести поради убиството на новинарот Јан Куциак и неговата вереница.
Пелегрини претходно соопшти дека до претседателот на Словачка доставил 79 потписи од 150 пратеници во словачкиот Парламент кои докажуваат дека мнозинството се согласува тој да состави влада.
Фицо вчера понуди оставка под услов неговата партија Смер да биде таа која ќе предложи нов премиер со цел да се избегнат предвремени избори а со тоа и новата коалициска Влада, иако со други министри, да остане на власт до завршувањето на мандатот во 2020 година.
Пред два дена оставка поднесе министерот за внатрешни работи на Словачка, Роберт Калињак.
Десетици илјади луѓе во петокот протестираа во Братислава и другите словачки градови барајќи темелна истрага за убиството на новинарот Јан Куциак и неговата вереница и оставка од премиерот Роберт Фицо.
Тоа беа најголеми протести во Словачка од Кадифената револуција во 1989 година.