Да се стави крај на дивите масери кои се преставуваат како терапевти, а имаат направено големи штети на многу пациенти, бараат од Здружението на професионални физиотерапевти на Македонија. Не се знае колку само наречени терапевти масираат и местат пршлени на диво во приватни куќи, а многу од пациентите се плашат да ги пријават иако им нанеле голема штета на здравјето. Од Здружението на професионални физиотерапевти велат дека со воведување на закон и основање на Комора на физиотерапевти ќе се стави ред, ќе се воведе регистар, ќе се издаваат лиценци за работа, а со тоа ќе се стави и крај на дивите терапевти.
„Има пациенти што доаѓаат кај нас потоа, но има и еден феномен, тие ретко зборуваат за своите лоши искуства од разни местачи и масери. Постојат фрапантни случаи. Се додека не се воведе ред, не се донесе закон и не се формира Комора на физиотерапевти ќе ни се случува тоа“ изјави Горан Саневски претседател на Здружението на професионални физиотерапевти на Македонија.
Тој нагласи дека образованието, можноста за прогресија и истражувачка работа се многу важни и затоа наместо три треба да им се овозможат четиригодишни студии со можност за напредување понатаму. Но, директорите на Јавните здравствени установи распишуваат огласи за физиотерапевти само со завршено средно образование иако тоа не носи квалитет и прогрес, а во Светската федерација на физиотерапевти такво нешто не постои и не е дозволено.
Ситуацијата е слична во повеќето земји од поранешните ЈУ простори, но Македонија заостанува зад нив. Во Црна Гора ситуацијата не е лоша, таму веќе имаат Закон за физиотерапевти и можат да се заштитат од луѓето кои сакаат да се збогатат на лесен начин.
„Добивме закон во јануари и во март годинава основавме комора да се заштитиме од луѓето кои на ваков начин сакаат да се богатат. Но и Управата за инспекциски надзор си ја врши својата работа, граѓаните пријавуваат и мислам дека годинава има околу 20 тина пријави за диви масери“, изјави Крсто Ковачевиќ претседател на Здружението на физиотерапевти на Црна Гора.
Словенија и Хрватска се земји кои најмногу напреднале во овој поглед, така што Ковачевиќ вели дека учат од хрватските искуства. Во Словенија постојат 1200 физиотерапевти во примарна, болничка и приватна пракса. Нивното здружение е член на Светското здружение на физиотерапевти.
„Имаме се што ни треба, имаме своја автономија да работиме како сметаме и постои Национален план. Законот дозволува и работа како концесионери. Во Словенија постои закон за заштита од само наречените терапевти и годинава имавме десеттина пријави за диви масери, но тешко е да се контролира ситуацијата“, рече Габриела Старц, претседател на Здружение на физиотерапевти на Словенија.
Нејзината колешка од Хрватска, Катерина Иванковиќ вели дека имаат и закон и комора, а целта им е да го подигнат нивото во осамостојување на професијата.
„Се обидуваме да се избориме за подигнување на нивото бидејќи најголем проблем е што здравствениот и образовниот систем не се синхронизирани“, вели Катерина Иванковиќ од Хрватски збор на физиотерапевти.
Во БИХ Комората на физитерапевти е основана во 2011 година и од тогаш издава лиценци за работа.
„Сепак, проблем е што не е донесен закон кој е веќе подготвен, така што с е надеваме дека Министерството за здравство ќе има слух тоа да се случи набргу, изјави Маја Зељко од Комората на физиотерапевти на Федерација на БИХ.
Физиотерапевтите за овие и слични проблеми ќе разменуваат искуства и ќе дискутираат на Првата регионална конференција која во наредните два дена се одржува во Скопје.