Државниот врв добил покана за вчерашниот натпревар, но тие не се одѕвале, велат за НОВА од фудбалскиот клуб Шкендија кои по вчерашниот пораз од белгискиот Гент со 4:0 ja изгуби шансата за влез во групната фаза во Лигата на Европа.
Ваквата историска шанса на клуб од Македонија вчера осамна на второ место, откако медиумите се зафатија со присуството на опозицискиот лидер Зоран Заев на натпреварот.
„Навиваме за Шкендија и за нов успех на Македонија“, напиша Зоран Заев на официјалните профили на социјалните мрежи споделувајќи фотографија од натпреварот.
Објавата на Заев предизвика провладините медиуми оркестрирано да објавувааат дека Заев застанал рамо до рамо со навивачите на Шкендија, познати по националистичкото навивање и величaње на УЧК и Голема Албанија.
На фудбалскиот натпревар присуствувал и вицепремиерот Владимир Пешевски, но за ова ниту збор не беше објавен во истите медиуми.
Од фудбалскиот клуб велат дека нивните достигнувања секогаш се ставени во втор план. Оттаму посочуваат дека тимот не може да ја контролира ситуацијата на трибините и велат дека се против тоа што тимот се искористува за политички цели.
– На натпреварот вчера присуствуваа и опозицискиот лидер Зоран Заев и вицепремиерот Владимир Пешевски. Посебна благодарност до Пешевски кој редовно ги следи нашите натпревари. Имаше покана и за претседателот на државата Ѓорѓе Иванов и за актуелниот премиер Емил Димитриев и сите се добредојдени. Што повеќе да направи Шкендија? Зошто секогаш сме мета на политички поени? Ве молам, 5 Македонци ми играат во клубот, генералниот секретар е Македонец, ако Шкендија е националистички клуб не знам кој. Имало скандирања на натпревари и против Албанците и против Македонците, што треба да се прави, ние да се занимаваме и со ситуацијата на трибините?, вели за НОВА директорот на клубот Ибраим Рамадани.
Дел од навивачката група вчера на трибините на Филип Втори нападнала еден косовски државјанин и еден полицискиот службеник кој приватно ја следел играта, но со себе имал пиштол кој навивачите му го одзеле.
Од СВР Скопје велат дека шест лице биле приведени веднаш по инцидентот и им биле издадени платни налози за сторени прекршоци од Законот за спречување на насилството и недоличното однесување на спортските натпревари.