Ви благодарам г-дин Флекенштај за ова интервју само неколку часа по заклучоците на Советот на министрите. Како ги толкувате овие заклучоци? Успех или не?
Флекенштајн: Би им честитал на Македонците бидејќи ова е јасна одлука дека сакаме да почнеме преговори. Но и јас сум малку разочаран затоа што датумот е јуни идната година. Сепак треба да се има во предвид дека ви треба половина година за подготовки во секој случај. Со ова јасно се става на знаење дека има заслуги на Владата и Парламентот во спорот со името и очекувам подготовки за преговорите и да ги почнеме идната година.
Комисијата ќе почне со скрининг на македонското законодавство. Што мислите за условите за преговори?
Флекенштајн: Ако внимателно ги читате заклучоците, тие велат – ајде Владо одете напред, работете. Знам дека никој во Македонија не сака да се престане со реформи и знам дека ова звучи како услов, но она што заклучокот сака да го каже е дека треба да се тргне, дека не треба да се чека на преговори и мислете на потребните промени и сите се надеваме дека референдумот ќе биде позитивен.
Мислите ли дека Комисијата беше во право со одлуката да ги стави во еден пакет Македонија и Албанија?
Флекенштајн: И да и не. Од една страна секоја земја треба да се гледа посебно а успех е да се оди напред. Но од друга страна, двете земји беа успешни во нивните политики и тоа е примено на знаење од Советот. Тоа е добро и за регионот и неговата стабилност.
Зошто Франција беше толку против овие преговори?
Флекенштајн: Не знам точно но претпоставувам дека претседателот Макрон има многу проблеми дома со реформите, без оглед дали се тие неопходни или не. И можеби стравува како луѓето ќе го сфатат овој нареден чекор кон подготовка за прием на нови членки. Мислам дека тоа е тотално погрешен приод но тоа е засега причината. Знам исто така дека во принцип Франција нема ништо против прием на нови членки од Западниот Балкан но можеби овој временски период не е најдобриот.
Тие сакаат реформирана ЕУ пред проширувањето?
Флекенштајн: Да, тој така вели и јас се согласувам. Но, почеток на преговори значи 5, 7 или 9 години а ако ние во тој период не успееме да ја реформираме ЕУ, тогаш не сум сигурен дека би ве советувал да се придружите во тој клуб.
Што треба Владата сега да направи?
Флекенштајн: Владата треба да продолжи со реформската агенда. Немам сомнение дека Парламентот и Владата, и опозицијата, ќе бидат дел од тоа. Треба да се продолжи и да се заврши домашната работа во владеењето на правдата на пример.
Моите две последни прашања. За Договорот помеѓу Македонија и Грција. Какво е вашето мислење и какво расположението овде во Европскиот парламент?
Флекенштајн: Расположението е многу позитивно кај сите 28 земји членки вклучително и Франција. Среќни сме што има преговарано решение помеѓу двете Влади и Парламентите. Се разбира очекуваме позитивен исход на референдумот но оптимисти сме и сметаме дека народот во Македонија ќе види дека е ова голема шанса и фер решение.
Последно прашање. Вие со неколку пратеници пративте писмо до ЕУ и рековте Северни Македонци….
Флекенштајн: Не ми ја допирајте раната! Да, ја направив таа грешка. Моја цел не беше да повредам било кого но беше само од недоволно познавање. Но сега и до крајот на мојот живот знам дека сте Македонци, Македонци а не јужни, источни, западни Македонци.
Благодарам.