Седумкратниот шампион во Формула 1 и за многумина најдобар возач на сите времиња, Михаел Шумахер (48) влегува во последниот круг од најважната трка во животот. Германскиот пилот е во кома од 2013 година по стравичниот пад при скијање во француски Мерибел и за неговата реална состојба се знае малку. Но, шведскиот весник „Експресен“, сепак, успеа да дознае нешто и излезе со тврдење дека лекарите ќе се обидат со нова, последна, операција.
Весникот наведува дека Шумахер наскоро ќе биде транспортиран во Далас, САД, каде ќе биде третиран од доктор Џулијам Микс, еден од најценетите светски невролози.
„Имам големо искуство со такви пациенти. Се сомневам дека некој во Европа лекувал повеќе такви пациенти“, истакна Микс кого го опишуваат како единствена личност која може да му помогне на Шумахер.
Во посета на Шумахер во неговиот дом во Швајцарија беа добар дел од најдобри светски специјалисти, но ниту една терапија досега не предизвика будење од кома. Семејството го вложи сиот стекнат имот на лекување меѓутоа ефект засега нема.
Несреќата на Шумахер се случи на 27 декември во 2013 година додека скијаше со синот Мик во француските Алпи. Среќна околност при падот и ударот со глава во камен беше заштитната капа што Германецот ја носеше во моментот. Лекарите уште тогаш потврдија дека во случај да скијал без неа, смртта ќе настапела на лице место. Наредните три месеци ги мина во индуцирана кома по што ситуцијата се стабилизира. Кон крајот на 2014 година светските медиуми објавија дека Шумахер е парализиран, не може да говори и дека има проблеми со меморијата. Информациите за неговата состојба се толку дозирани и според последните од септември во 2016 година тој е неподвижен.