Рон Денис (70) се раздели со Мекларен по 37 години соработка. Под негово водство, како поранешен извршен директор, тимот со седиште во Вокинг, Англија, беше еден од најуспешните во историјата на Формула 1 шампионатите.
Денис беше сменет од позицијата во ноември во 2016 година. Притоа ги продаде своите 25. отсто акции на инвестицискиот фонд од Бахреин како доминантен сопственик и на Мансур Ожех како малцински и поднесе оставка во управниот одбор.
Медиумите на Островот го поврзуваат комплетното излегување на Денис од Мекларен поради несогласувања со Ожех. Двајцата важеа за добри пријатели и бизнис партнери до пред неколку години кога ги оладија односите поради лични и деловни причини.
Денис влезе во Мекларен во 198о година. Контролата врз екипата ја презеде една година подоцна и во наредните две децении ја направи една од најдоминантните во „летечкиот циркус“. Со машини на Порше, во периодот од 1984 година до 1987 година, Ники Лауда освои една шампионска титула, а Алан Прост две.
Беше и еден од најзаслужните за соработката на Мекларен со Хонда како добавувач на мотори за болидите. Таквото решение, сепак, не испорача очекувани резултати бидејќи екипата е последна во тековната сезона. Тимот лани беше шести во конкуренција на конструктори, а Фернандо Алонсо во неколку наврати при настапите упатуваше критики на сметка на моторот и неговите перформанси. Упатените во Ф1 приликите, посебно во клупските, укажуваат дека челниците на клубот бараат начин за раскинување на договорот со Хонда поради цврстата намера за соработка со Мерцедес.