Луис Хамилтон ќе тргне од пол-позицијата на утрешната трка за Големата награда на Австралија, првата трка од новата сезоната во Формула 1. Трикратниот светски првак по шести пат во низа ќе стартува од врвот на колоната на патеката „Алберт парк“ во Мелбурн по најбрзиот круг (1:22,188 минути) што го извозе во квалификациите. Од првиот ред, покрај него, ќе тргне и ривалот Себастијан Фетел.
Зад нив ќе бидат Валтери Ботас, тимски колега на Британецот во Мерцедес, и Кими Раиконен од Ферари. Место во третиот ред на стартот обезбедија Холанѓанецот Макс Ферстапен од Ред Бул и Французинот Рома Грожан, пилот на Хас. Меѓу најдобрите 10 времиња во квалификациите имаа Фелипе Маса од Вилијамс (седми), Карлос Сајнц Јуниор од Торо Росо (осми), неговиот клупски партнер Данил Квјат (деветти) и Даниел Рикардо од Ред Бул.
Трката за Големата награда на Австралија е утре изутрина во 07 часот по средноевропско време. За главни фаворити за титулата кај возачите важат Луис Хамилтон и Себастијан Фетел, за конструкторската ќе се натпреваруваат Мерцедес и Ферари. Актуелниот шампион е Нико Розберг кој по освоената титула во 2016 година објави крај на кариерата.