Голем интерес за серолошкото, скрининг тестирање за Ковид-19 кое почна денеска во Скопје.
На фотографиите кои ги објави Медиумската информативна агенција може да се забележи како граѓани во редица чекаат пред пунктот каде се врши скрининг-тестирањето кое треба да покаже каков имунитет на Ковид-19 има населението во Северна Македонија.
Скринингот се врши по случаен избор. Граѓаните пред да им биде земен примерок од крвта, пополнуваат листа со податоци.
Резултатите добиени од скринингот треба да и помогнат на Комисијата за заразни болести во планирањето на идните мерки во борбата против пандемијата.
Министерот за здравство Беким Сали, неодамна најави серолошка анализа на целата територија на државата.
„Оваа анализа ќе ни покаже реално колку сме имунизирани. Имаме евиденција колку сме вакцинирани, колку се со една, две, три вакцини, со какви вакцини. Но, знаејќи дека особено сојот омикрон поминува со полесна клиничка форма, голем број од нашето население не отишле за ПЦР-тест или сами го поминале омикронот во домашни услови. И сакаме да имаме јасна слика колку од нашето население го поминале ковидот и врз основа на овие резултати, ќе имаме една слика и мислам ќе излеземе пред јавноста да речеме дека според нашите бројки, евиденцијата која ја имаме, 41 процент се имунизирани со вакцина, но врз основа на истражувањето, можеби, сме 60 проценти имунизирани на природен начин“, рече Сали.
