Неколку часа по полноќ, во населба во јужниот дел на Атина, во сообраќајна несреќа загина популарниот 34-годишен грчки рапер Питер Анастасопулос, познат под уметничкото име Mad Clip, јави дописничката на МИА од Атина.
Несреќата се случила откако возилото што го управувал, најверојатно поради големата брзина, излетало од патот и удрило во бандера и дрво. Ударот бил толку силен, што според грчките медиуми, противпожарната служба околу два часа се обидувала да го извлече телото од возилото.
Според синоќешните објави на неговите официјални профили на социјалните мрежи, пред несреќата Mad Clip бил на свадба кај негов пријател и близок соработник. Роден во 1987 година во Њујорк, Mad Clip во изминатите години беше еден од попопуларните рапери во Грција.