Стотина граѓани се собраа денеска во дворот на Соборниот храм во центарот на градот Скопје за да го изразат својот револт од тоа што политичарите сакале да ја поделат Македонија и да воведат уште еден јазик, јавува репортерката на НОВА која во моментов е на терен.
Портпаролот на здружението „Тврдокорни“, кое е организатор на маршот, пред новинарите изјави дека нивното здружение постои еден месец и дека на мирен начин сакаат да покажат дека се незадоволни од она што политичарите го договарале за Македонија.
Портпаролот Драган Угриновски дополни дека не треба ова здружение да се меша со ниту една партија и дека конкретната причина за денешнот марш заинтересираните можат да ја видат на нивната Фејсбук страна.
Воедно, откако новинарите се обидоа да добијат одговори и од други граѓани, да ги прашаат зошто присуствуваат на маршот, Угриновски не дозволи никој друг освен тој да дава изјава и се закани дека ако новинарите не го почитуваат кодексот кој тој го наметнува, тогаш нема да добиваат воопшто никакви информации.
Од Соборниот храм, маршот ќе продолжи кон паркот Жена-борец каде што е предвидено пред споменикот на бранителите да се положи цвеќе.
