Пријателски со моите колеги од Бугарија – објави на социјалната мрежа Фејсбук заменичката на премиерот Славица Грковска која е на чело на ресорот што се грижи за добро владеење на Владата и на владиниот апарат.

Грковска притоа објави и фотографија со гостите од Бугарија на која е во друштво и со министерот за правда Никола Тупанчески, за кого јавноста очекува да ги достави до вицепремиерката уплатниците и другите докази дека платил за летот до Палермо и другите трошоци при неговото патување и следење на фудбалскиот натпревар меѓу македонската и италијанската репрезентација.

Тупанчески деновиве изјави дека сите сметки и извршени трансакции ќе ги приложи „таму каде што треба“, додавајќи дека е точно оти летал со чартер летот организиран од Фудбалската федерација на Македонија но дека сам ги платил авионскиот билет и влезницата за натпреварот.

По огромниот притисок од јавноста кабинетот на Грковска посочи дека побарале од Тупанчески да ги приложи сметките за летот и престојот во Палермо, меѓутоа се уште не соопштуваат дали министерот за правда одговорил на барањето на вицепремиерката задолжена за политики за добро владеење.