Од пред неполн час во Домот на пратениците почна средбата на партиските репрезенти за францускиот предлог. Во име на владата предлогот го образложува вицепремиерот Бојан Маричиќ а претставник од СДСМ е координаторот на пратеничката група Јован Митревски. Од ВМРО ДПМНЕ на средбата дојдоа партискиот потпретседател Александар Николовски и пратеникот Антонио Милошоски. Од ДУИ Арбр Адеми, Павле Трајанов како претставник на партиите ДОМ и ЛДП а од Алијанса за Албанците, пратеникот Елми Азири.

Претставниците на ВМРО ДПМНЕ избегнаа да дадат изјави пред почетокот на средбата. 

Павле Трајанов изјави дека она што барале да го видат и протоколот, наводно Маричиќ не го донесол на средбата.

„Без да го видиме Протоколот не можеме да донесеме заклучоци. Ние и вчера побаравме билатералните прашања да се отстранат од преговарачката рамка, ако тоа не успее нашата поддршка ќе биде дискутабилна, изјави лидерот на Демократскиот Сојуз, Павле Трајанов.

Координаторот на пратеничката група на СДСМ, Јован Митрески истакна дека „преговарачката рамка не може да се менува но ќе биде облигаторно за владата се што во форма на заклучок ќе се донесе на ниво на оваа работна група“, изјави Митревски.

Адеми од ДУИ пред средбата повтори дека рамката е добра основа за почеток на преговорите и дека македонскиот јазик бил чист без додавки и фусноти а идентитетските прашања гарантирани.

Со оглед на фактот што на оваа средба партиските претставници не можат да се запознаат со содржината на Протоколот, кој со себе во Клубот на пратеници не го понесол Маричиќ според првичните сознанија, тешко е веројатно дека денеска би се излегло со заклучоци од ова работно тело. (М.Т.)