Според ФРОДЕМ, лидерот на ВМРО-ДПМНЕ, Никола Груевски се плаши од парламентарни избори и ја избегнува правдата.
– ФРОДЕМ оценува дека врхушката на ДПМНЕ односно осамениот Груевски се плаши од парламентарни избори кои треба да се одржат наесен. Затоа Груевски настојува преку завлекување на тешката државна криза, парламентарните избори да ги префрли за идната година, да ги спои со локалните и на тој начин да го препокрие слабиот резултат. Истовремено, Груевски со развлекувањето на кризата има за цел да ја избегне правдата и да создаде уште поголема криза во која тој најдобро би се снашол и би го конфронтирал поделениот народ по партиско-граѓанска, но и по етничка основа, се вели во соопштението на ФРОДЕМ.
Оттаму сметаат дека Груевски се служел со сталинистички методи, од “прегазеното време на Милошевиќ, Груевски очајно се обидува да активира приврзаници за одбрана на криминалот и конфронтаирање со целиот демократски свет“.
– Вчера, во полупразната сала и задоцнета прослава, од Груевски разбравме дека имал притисок од „народот“!? Божем народот „вриел“ и од него барал акција! Потсетуваме дека оваа и сличните најави целосно се поклопуваат со “спонтаните случувања“ на народот во организација на пропаднатиот режим на Милошевиќ. Веќе видени, пропаднати и прочитани сценарија! Повикувањето на народот е само уште еден кукавички обид не еден политички очајник кој настојува да се затскрие зад народот, се вели понатаму во соопштението.
ФРОДЕМ ги повикува сите граѓани, правдољубиви демократи и патриоти без оглед на политичката, верската или етничката припадност, сите заедно сплотени вечерва во 19 часот, пред зградата на Специјалното јавно обвинителство да го поддржат враќањето на правдата и достоинството во Македонија.
– Времето за манипулации истече. Или ќе се почитува Уставот на РМ, ќе се врати поредокот и законите ќе почнат да важат за сите подеднакво и правдата ќе биде неселективна или се во оваа земја треба да почне да се гради одново, порачува ФРОДЕМ.