Демократската унија за интеграција (ДУИ) и Движењето ПОПУЛИ (НАРОДОТ) потпишаа коалициски договор за парламентарните избори 2024 година.
Лидерот на Демократската унија за интеграција, Али Ахмети по потпишувањето на договорот, најави дека во наредните денови ќе биде потпишан договор и со други политички партии со кои продолжуваат преговорите за приклучување кон „Фронтот за Европа“.
– Големите работи не се прават сами. Зошто овој фронт треба да биде изграден во 2024 година? Затоа што овие се времиња во кои се бара ова обединување, бидејќи работите во глобалната политика одат наопаку. Немаме ништо против другите политички партии, но тие немаат капацитет да се соочат со овие работи што се случуваат кај нас и околу нас, затоа ова обединување е неопходно, не само од Албанците, туку и од Турците, Бошњаците, Ромите…, рече Ахмети и повика на поддршка за кандидатот на ДУИ, Бујар Османи за претседател на државата.
– Ве повикувам како браќа и сестри за целосна мобилизација затоа што на 24 април имаме референдум, ќе одиме напред или ќе стоиме во место, рече Ахмети.
Претседателот на Движењето ПОПУЛИ, пратеникот Скендер Реџепи Зејд рече дека за него е задоволство да се приклучи на ова проевропско патување, кон подобра иднина и поквалитетна и позначајна политика за сите. Тој истакна дека е направен вистинскиот избор бидејќи се приклучи, како што рече, во „суперлигата“.
– Денес е историски ден за нас, бидејќи денеска се отвора поглавјето на Европскиот фронт. Во ова патување кон европска иднина, иницијатива која ќе биде успешна, бидејќи овој фронт го сочинуваат ДУИ и Движењето ПОПУЛИ. Да не заборавиме дека ДУИ има 22-годишен пат во политиката, учество во владеењето, така што Движењето ПОПУЛИ ќе биде голема помош на овие избори со оваа соработка, со суштинска програма за семејството, државата и општеството. Заедно ќе се бориме со негативните појави во општеството, така што Европскиот фронт ќе прави чуда и ќе докаже дека имаме добар капацитет, не само да победиме на изборите, туку се натпреваруваме и во суперлигата, изјави Реџепи.
На Фронтот за Европа на Али Ахмети, според информациите на „Фронтлајн“ се очекува да се приклучат и Алијансата за Албанците – крилото на Зиадин Села, Демократската партија на Албанците на Мендух Тачи, Европската демократска партија на Арјанит Хоџа, додека како што информираше лидерот на ДУИ, Али Ахмети „Фронтот за Европа“ во рамките на коалицијата „Да за Европа, не за Русија!“, разговара да приклучи и партии од Турската зедница, Боѓњачката, Ромската, како и граѓански сектор, интелектуалци итн., со кои разговорите се во тек.
Дестан Јонузи / Фронтлајн