Бесир Демири (22) е нов член на Вардар. Младинскиот репрезентативец на Македонија потпиша тригодишен договор со актуелниот шампион. Промоцијата на фудбалерот што игра на позицијата лев бек, но може да одговори и како последен играч за врска и офанзивен крилен, се случи денеска во клупските простории.
Почетоците на кариерата на Демири се врзани со фудбалската академија на Бешикташ, во домашната сцена настапуваше за Шкендија Арачиново, Шкупи и тетовска Шкендија од каде пристигна во Вардар. За македонската млада селекција со која ќе настапи и на ЕП 2017 во Полска досега одигра 13 меча и пришто постигна и еден гол, а за сениорскиот „црвено-жолт“ тим има два натпревара.
Истовремено Вардар се раздели со Немања Мијушковиќ. Раскинот на соработката со Црногорецот е спогодбен и тој е слободен да побара нова средина во зимскиот преоден рок. Мијушковиќ беше вардаров член во изминатата година ипол.