Аријан Адеми се враќа во репрезентацијата на Македонија. Фудбалерот на Динамо Загреб е на списокот со 23 фудбалери на кои смета селекторот Игор Ангеловски за дуелите со Италија во Торино (6 октомври) и со Лихтенштајн во Струмица (9 октомври), последни во квалификациите за Светското првенство во Русија во 2018 година. Неговото отсуство од националниот тим се должеше на двегодишната суспензија што ја доби за позитивен допинг наод по дуелот со Арсенал во групната фаза во Лигата на шампиони во 2015 година.
Во националниот тим се враќа и Ферхан Хасани. Капитенот на Шкендија поради повреда ги пропушти мечевите со Израел и со Албанија во септември, а по надминување на проблемите повторно се става на располагање на стручниот штаб.
Четворица од повиканите 23 играчи нема да бидат во комбинација за натпреварот со „азурите“. Стефан Ристовски и Кире Ристевски ќе паузираат поради жолти картони, Елиф Елмас и Никола Ѓорѓев ќе бидат под команда на Благоја Милевски во младата селекција за мечот со Србија. Нивното приклучување кон А тимот е најавено за настапот на „Младост“ во Струмица. Од септемврискиот ростер воопшто ги нема Давид Бабунски, Дени Илиев и Мите Цикарски кој беше дополнително повикан по откажувањето на Хасани.
Собирот на фудбалската репрезентација e закажан на 2 октомври во Скопје.
Состав на Македонија за дуелите во Италија (6 октомври, Торино) и со Лихтенштајн (9 октомври, Струмица) во квалификациите за СП 2018
Голмани
Столе Димитриевски (Гимнастик Тарагона/Шпанија)
Давид Митов Нилсон (Норчепинг/Шведска)
Дамјан Шишковски (Работнички)
Одбрана
Стефан Ристовски (Спортинг Лисабон/Португалија)
Кире Ристевски (Вашаш/Унгарија)
Дарко Велковски (Вардар)
Ѓоко Зајков (Шарлроа/Белгија)
Кристијан Тошевски (Пелистер)
Висар Муслиу (Вардар)
Среден ред
Стефан Спировски (Ференцварош/Унгарија)
Езџан Алиоски (Лидс, Англија)
Енис Барди (Леванте/Шпанија)
Никола Ѓорѓев (Твенте/Холандија)
Љупчо Дориев (Академија Пандев)
Бобан Николов (Вардар)
Елиф Елмас (Фенербахче/Турција)
Аријан Адеми (Динамо Загреб/Хрватска)
Напад
Горан Пандев (Џенова/Италија)
Илија Несторовски (Палермо/Италија)
Александар Трајковски (Палермо/Италија)
Ферхан Хасани (Шкендија)
Иван Тричковски (АЕК Ларнака/Кипар)
Марјан Радески (Шкендија)