Шкендија ја совлада Ренова со 2:0 во „битката за Тетово“ во рамки на осмото коло од фудбалското првенство на Македонија. Тандемот Ибраими – Хасани и овојпат се покажа како решавачки за седма радост на вицешампионот во сезоната, но и единствен без пораз во конкуренцијата.
Ибраими реализира во шестата минута, капитенот во 35. за завршување на задачата уште во првиот дел и рутинско одработување на вториот. Шкендија е лидер на табелата со 22 бода, осум повеќе од Академија Пандев и девет од Вардар чии фудбалери, пак, имаат и два меча помалку поради обврските во Лига Европа.
Работнички и Силекс одиграа без голови на „Телеком арена“ во дебито на Горан Станковски на клупата на „црвените“ од Градски парк. Победник немаше ниту во вториот меч во главниот град во кој Шкупи и Пелистер одиграа 1:1. Оливер Пеев обезбеди водство за битолчани во 40 минута од првото полувреме, стрелец на израмнувачкиот погодок за чаирчани беше Ален Јашаровски во 69.
Победа и Скопје го одиграа најефикасниот меч во некомплетното осмо коло. Прилепчани славеа со 4:2 и се издигнаа над опасната зона на табелата оставајќи го притоа ривалот на чекање за прв триумф во шампионатот. Серијата голови за домашните ја отвори Благоја Гешоски во 29 минута, а ја затвори Борче Маневски во третата минута од судиското надополнување на средбата. Останатите два погодока за Победа ги постигнаа Дарко Илиески во екстра времето на првиот дел и Дејан Цветановски во 49 минута додека Милош Џугурдиќ во 40. и Александар Ристевски (автогол) во 55. реализираа за гостите од скопска Железарница.
Мечот меѓу Академија Пандев и Вардар е одложен поради настапот на „црвено-црните“ во Лига Европа. Шампионот утре попладне (19 ч.) му гостува на Розенборг во второто коло од групата Л.
Прва лига, 8 коло
Шкендија – Ренова 2:0
Работнички – Силекс 0:0
Шкупи – Пелистер 1:1
Победа – Скопје 4:2
Мечот меѓу Академија Пандев и Вардар е одложен поради настапот на „црвено-црните“ во Лига Европа.
Табела: Шкендија 22, Академија Пандев 14 (-1), Вардар 13 (-2), Шкупи 12, Силекс 10, Пелистер 9, Победа 8, Работнички 6, Ренова 6, Скопје 3.
Идно коло: Пелистер – Шкендија, Силекс – Академија Пандев, Ренова – Победа, Скопје – Работнички, Вардар – Шкупи