Реал Мадрид е првиот клуб што успеа да ја одбрани титулата во УЕФА Суперкупот по Милан во 1990 година. „Кралевите“ во Скопје славеа над Манчестер јунајтед со 2:1 и по четврти пат се упатија кон „Сантијаго Бернабеу“ со гравирана реплика на престижниот победнички пехар. По оригиналот, за што се потребни три победи во низа или вкупно пет, ќе може да атакуваат на 14 август догодина во Талин, но само ако останат владетели во Лигата на шампиони што е единствен начин за учество на големиот настан на „Ле Кок арена“ во естонската престолнина. Трофејот во трајна сопственост засега го имаат Милан и Барселона.
„Кралскиот“ клуб со неколку рекорди и моменти за нотирање донесе во спектакуларната фудбалска вечер во Скопје. Под водство на Зинедин Зидан ја забележа петтата победа во петтото одиграно финале. Но, францускиот менаџер може да биде задоволен и од други аспекти на екипата што ја предводи како на пример рекордната серија од 66 официјални настапи во сите натпреварување во кои Реал Мадрид постигнува барем еден гол.
Манчестер Јунајтед, секако, посакуваше со победнички изјави и во голем стил да влезе во новата сезона во домашната сцена и во Лигата на шампиони, но третиот пораз во четвртиот Суперкуп натпревар беше неизбежен за неговите фудбалери. Ако е за утеха, сепак, од настапот на „Телеком арена“ може да се извлечат и позитивни заклучоци и да се почувствуваат позитивни вибрации од составот на Жозе Мурињо.
Првиот е Немања Матиќ кој на скопскиот тревник покажа зошто Португалецот го посакуваше во екипата и беше упорен во реализација на трансферот. Вториот е поврзан со Ромелу Лукаку кој понуди неспорна надеж за голови и да не го заборавиме Маруан Фелаини кој уште еднаш се претстави како ефективен фудбалер за Јунајтед. Тоа најдобро се виде по влегувањето во игра, се избори за топка и продолжување на нападот по кој тимот од „Олд трафорд“ го прослави единствениот погодок, па очекувањата одат во насока дека ќе има огромен придонес за екипата во предизвиците што следуваат почнувајќи од викендот.