Пукна најсилната „бомба“ во зимскиот преоден рок во домашната фудбалска сцена. Агим Ибраими и даде „беса“ на Шкендија за соработка со што тетовци добива нов голем адут, овојпат за одбрана на титулите во првенството и во купот. Детали сè уште се непознати (плата + времетраење на договорот) и се очекува нивно откривање во деновите што претстојат.
Агим Ибраими е дете на Шкендија. Фудбалските почетоци ги направи кај тетовските „црвено-црни“ за кои ја одигра сезоната 2005/06 пред да замине на калење и во австриски Салцбург (2006 – 2008 година). Најголем период како сениор мина низ словенечките клубови, најсилен впечаток остави во Марибор.
Во „дежела“ го носеше дресот и на Олимпија од Љубљана, на Нафта Лендава и на Домжале во чиј дрес ја одигра ланската сезона. Куса авантура во кариерата имаше во турски Ескишехирспор (2010/11), беше позајмен во Калјари во сезоната 2013/14, а сезоната 2016/17 беше член на екипата на Астана од Казахстан.
Агим Ибраими во минатото беше стандарден репрезентативец на Македонија. Во националниот дрес дебитира во 2009 година и до 2016 година забележа 39 настапи во кои постигна седум гола.