Детската кардиохирургија е ставена на стен бај. Здравствените власти во моментот разгледуваат што ќе се прави понатаму, откако целиот тим од Државната кардиохирургија предводена од Владимир Чадиковски си замина од приватната болницата за кардиохирургија на Жан Митрев во приватната болница „ Аџибадем Систина“.
„Не сме утврдиле што ќе се прави во иднина, во овој момент разгледуваме што понатаму. Жан Митрев има буџет да оперира до крајот на годината, а потоа ќе видиме“, изјави Ден Дончев, директор на Фондот за здравствено осигурување.
Од ФЗОМ, потврдија дека не постоел никаков договор за јавно приватно партнерство со болницата на Жан Митрев иако тоа беше најавено на прес конференција во Влада на почетокот на годината.
„Сакајќи да постигнеме синергија од медицински и кадровски аспект се одлучивме на тој проект. ФЗОМ плаќаше по 400 до 500 000 евра на странски лекари кои вршеа операции на срце кај бебиња до 1 година. Во кардиохируршката болница, Жан Митрев не се изведуваа операции на деца до 1 година, а таму има одлични услови за пациентите. Но, ете од одредени причини проектот не успеа“, рече Дончев.
Тој нагласи дека новата цена со плус 25 отсто за ДГР и 10 отсто за терцијално здравство е единствена цена за сите( Жан Митрев, Аџибадем Систина) каде што се вршат операции срце кај бебиња. Државна детска кардиохирургија веќе не постои, откако здравствените власти се одлучија на овој проект кој се покажа за неуспешен.
За ФЗОМ е ирелевантно што Чадиковски е единствен лиценциран детски кардиохирург. Властите велат дека бебињата и понатаму додека има буџет, ќе се оперираат кај Жан Митрев за кој претходно кажаа дека до започнување на овој проект не оперирал деца до 1 година.
Откако целиот тим на Чадиковски си замина во „Аџибадем Систина“, а тој претходно си даде отказ поради несогласување со Жан Митрев, се покрена лавина на реакции во јавноста за целиот овој проект. Антикорупциска комисија отвори предмет за случајот, а беше најавено дека ќе собираат документација од сите инволвирани институции за да се види дали се постапува според законската регулатива.