По написите во медиумите за блокираната сметка на Клиниката за гинекологијата и акушерство и за донаторската кампања за собирање средства за набавка на нова опрема, од Клиниката денеска ги потврдија двата случаи, но истакнуваат дека тие не се меѓусебно поврзани.
-Блокадата е поради исплати по извршни решенија од суд. Станува збор за судски процеси водени за ретинопатии кај новороденчињата од 2008г. период во кој воопшто не постоела скрининг програма во државата. Станува збор за оштетувања на видот кај новороденчиња родени со исклучително мала телесна тежина и голема незрелост. Дојдена е извршна пресуда од 40.974.561 денари, сума на процеси од пред 10 години која сега би требало одеднаш да се плати, се вели во соопштението од ГАК.
Од ГАК уште појаснуваат дека донаторската кампања која е започната минатата година е за да се соберат средства за набавка на нова опрема, опрема која, како што велат од Клиниката, или застарела од изминатите 10 и повеќе години или опрема која не ја поседувале.
Од ГАК велат дека во моментов располага со доволно ресурси за нормално функционирање и во најкус можен рок ќе се надмине новонастанатата состојба.
Претходно, директорката на ГАК Викторија Јовановска за НОВА објасни за случајот со блокираната сметка, како и за донаторската кампања. НОВА објави и фотографии од моменталната ситуација во болницата.