Најмалку 34 лица загинале, а 285 се повредени, од кои 10 деца, во нападот врз украинскиот град Харков, објави на официјалната Фејсбук страница Главната дирекција на Државната служба за итни случаи на Украина.
„Во текот на изминатиот ден непријателот продолжи да гранатира станбени населби при што настрадаа цивили. Цел на гранатирање и артилериски напади покрај Харков, беа и околните села Јакивливка и округот Хорошев“, пишуваат од украинската Државна служба за итни случаи, додавајќи дека спасувачите интервенирале во гасење на 30-тина пожари во станбени згради и приватни објекти предизвикани од гранатирањето.
Оттаму велат дека утрово околу 8 часот по локално време, центарот на Харков повторно бил мета на напад од страна на руските воени сили. Ракетите погодиле две административни згради, опожарена била површина од околу 600 квадратни метри
„За време на спасувачката акција, екипите на Државната служба за спасување од под урнатините извлекоа 10 лица. За жал четворица мажи беа убиени“, се вели во објавата на ДСИС.
од Дирекцијата додаваат дека ноќта околу 23 часот цел на воздушен напад било селото Јаковливка од заедницата Мерефјан во областа Харков. Најмалку 30 приватни домови биле уништени од бомби. 7 лица биле повредени, а 10-тина биле спасени од нападот. Во нападот на селото Јаковливка, загинале тројца жители – цивили.
Од Државната служба за итни случаи на Украина велат дека во моментов три единици за спасување со 20-тина спасувачи го пребаруваат теренот барајќи повредени или загинати лица.
(Б.Б.)
