Договор за датум за избори не е постигнат ниту на денешната лидерска средба кај претседателотѕ Стево Пендаровски поради, како што рече, претседателот на „Алтернатива“, Африм Гаши ненадминливите разлики во ставовите на двете најголеми македонски партии.
„Двете македонски партии не остапија од своите различни ставови за датум за одржување на изборите. Едните беа за јуни, другите за крајот на август или почетокот на септември. Ако дотолку не се разликуваа, тогаш изборите ќе се одржеа и во терминот што го предложивме и ние, а тоа е крајот на јуни“, рече Гаши.
Лидерот на „Алтернатива“ изрази надеж дека во наредниот период ќе следуваат средби за определување на датум со консензус и притоа да се има предвид дека на државата ѝ се потребни институции, но исто така да не биде доведено во прашање здравјето на граѓаните на денот на изборите.
На прашањето дали е можно да се дојде до датум без консензус, Гаши рече дека на средбата денеска било споменато дека според уредбата, кога ќе биде укината вонредната состојба, почнуваат да течат роковите за избори, но Гаши рече дека тие како партија не се за такво решение без консензус.